Í dag 1. febrúar er dagur kvenfélagskvenna. Kvenfélagasamband Íslands á afmæli í dag og var stofnað fyrir um áttatíu árum. Kvenfélögin státa af því að vera stærsta félagssamband kvenna hér á landi.
í Kvenfélagi Mosvallahrepps getum við státað að því að 85 % kvenna sem búa í sveitinni eru í félaginu og fimm konur sem búsettar eru fyrir utan Önundarfjarðar eru virkar í félaginu.

Í lögum félagsins stendur að markið með stofnun félagsins sé að bjóða konum upp á að sinna sínum hugarefnum koma saman og njóta félagsskaps hverra  annarra. Þetta markmið hefur verið haldið í heiðri í þau 50 ár sem félagið hefur verið starfrækt. Auk þess hafa félagskonur stutt mjög við allt félagsstarf í sveitinni og styrkt mörg málefni utan sveitar.

Ef skoðuð eru rit félagsins frá upphafi hefur stöðugt verið unnið að því að styrkja félagsauð innan sveitarinnar, það er marg sannað og rannsakað að félagsauður er einn af sterkustu þáttum sem fólk nefnir þegar það er að nefna ánægju með búsetu í þeim kjarna sem það býr í.

Svo ekki sé talað um þann félagsauð sem maður eignast sjálfur með því að umgangast skemmtilegar konur. Vinna að hugðarefnum sínum, og öðrum skemmtilegum málefnum, því fátt er okkur óviðkomandi.

 

Til hamingju með daginn konur í Kvenfélagi Mosvallahrepps.

Halla Signý Kristjánsdóttir 

Jólaboð Kvenfélags Mosvallahrepps verður haldið á morgun, mánudaginn 27. des. í Holti Friðarsetri kl 17:00. Það verður  sungið og dansað kringum jólatré, undirleik annast Hljómsveit Árna á Vöðlum. Við eigum von á rauðklæddum Sveini sem ætlar öruglega að sprella svolítið og syngja með okkur.  Svo verður heitt súkkulaði og kökur og tertur eins og venja er hjá kvenfélagskonum.
Allir velkomnir.
jólakveðja
nefndin.

Kvenfélag Mosvallahrepps heldur basar í Holti friðarsetri, laugardaginn 20. nóvember kl. 14:00-17:00.
Mikið af fallegri jóla- og gjafavöru sem er handunnin af kvenfélagskonum. Hér  má sjá sýnishorn af þvi sem í boði verður.
Þar verður í öndvegi íslenska ullin okkar. Handunnir jóladúkar sem kvenfélagskonur hafa komið saman til að þæfa og skreyta og íslensk jólaepli úr ull. Við erum líka búnar að prjóna úr ullinni, húfur, vetlinga og sokka. Úr leðri og roði verða belti, armbönd og nælur. Úr perlum og hrauni, skartgripir og merkinælur fyrir prjónakonur. Margt fl. fallegt handverk verður til sölu. Að auki verður ýmislegt matarkins eins og sultur, smákökur, rúgbrauð.  Upplagt að taka helgarrúntinn í Friðarsetrið í Holti.
Kaffisala ásamt meðlæti. Verið velkomin.

Þann 12. október varð Ásta Ásvaldsdóttir áttræð, hún mun bjóða til afmæliskaffi í Friðarsetrinu í Holti kl 15:00 á sunnudaginn. 17. október.
Ásta er  ein af stofnfélögum Kvenfélags Mosvallahrepps og hefur starfað í félaginu alla tíð síðan. Hún var formaður þess í nokkur ár og hefur unnið ötulega að ýmsum málefnum sem félagið hefur látið sig varða.
Frá Kvenfélagi Mosvallahrepps fær Ásta innilegar afmæliskveðjur með góðum óskum um bjarta daga.

 

Af hverju voru kvenfélög stofnuð í landinu?

 

  Á kvenfélagsfundi í kvenfélagi Mosvallahrepps  í maí 1999 las Sigga upp úr árbók Þingeyinga bréf frá 1896 þar sem bóndi einn deildi á óþrifnað á bæjum og leggur til að stofnuð verði samtök kvenna til að hafa eftirlit með störfum húsfreyja og myndi það geta orðið til þess að efla metnað þeirra.

 

En konur í Mosvallahreppi hreppi tóku ekki við sér fyrr en 60 árum síðar og stofnuðu kvenfélag enda höfðu þær ekki ástæðu til að auka metnað þeirra við húsmóðurstarfið heldur eins og segir í lögum félagsins í annarri grein:

 

Tilgangur félagsins er að auka kynningu og efla félagshug með konum sveitarinnar og veita þeim tækifæri til að koma saman og ræða áhugamál sín og hugðarefni.

8. gr. Árgjald félagskvenna skal vera 50 krónur og greiðist á aðalfundi. Nýjir félagar greið árgjald sitt við inngöngu. Félagskona getur verið hver sú kona orðið, sem náð hefur 16 ára aldri. (ef við framreiknum árgjaldið til dagsins í dag væri það 1200 krónur, en árgjaldið fyrir 2010, fimmtíu árum seinna er  1500 krónur )

 

Eins og áður sagði var stofnfundur haldinn að Kirkjubóli í Bjarnardal 10 . apríl 1960. 17 konur voru mættar. Fyrst var rætt um fundarstað, var talað um að halda fundina heima hjá félagskonum til skiptist og stungið upp á að fundarkonur nestuðu sig að nokkru leyti.

Rebekka talaði um að verslanir hér hefðu ekki heilhveiti og bar fram munnlega tillögu um að fela stjórninni að athuga hvort gæti ekki fengið nýmalað heilhveiti og perluger frá náttúrulækningafélaginu.

 

 

Strax á öðru fundi félagsins var greinilegt að mikill hugur var í konum því hann var haldinn aðeins mánuði seinna það var ekki bara heilhveiti sem konur voru hugsa um, heldur höfðu þær áhuga á að halda saumanámskeið og það vantaði fermingakirtla í Holtskirkju, en Dalsmenn voru fyrri til í þessum efnum og voru þegar komnir með tvo kirtla. Líklega hefur Ebba verið með fyrstu fermingabörnum sem fermdist í kirtlum sem kvenfélagið hafði keypt í Holtskirkju. En það var líka keypt plast til að búa til poka sem geyma átti kirtlana í.

Þarna var líka ákveðið að skreppa í skemmtiferð þá um sumarið og nota tímann milli mjalta. Um þetta var mikið rætt, sumar voru svo bjartsýnar um að það væri hægt að komast alla leið í Vatnsfjörð og heim aftur á einum degi en aðrar töldu að þá þyrfti að hafa með sér tjald og gista til þess að njóta ferðarinnar. Kosin var þriggja manna ferðanefnd og fékk Ásta 12 atkvæði, Guðrún Össurardóttir 7 atkvæði og Ágústína 5 atkvæði. Greinilegt er að Ásta hefur haft hæðst í þessari umræðu, og henni alveg trúandi til að hafa reynt að mæla með gistingu í Vatnsfirði. Þá um sumarið fóru félagskonur líka í berjaferð en ekki getið um hvert þær fóru.

Það var líka á þessum fundi sem grunnurinn var lagður að skólagarðinum í Holti.

Um haustið var sami hugurinn í konum, nú vildu þær efla til fjáröflunarsamkomu, já já þær ætluðu í útrás og halda skemmtun í félagsheimilinu á Flateyri, en það var dýrt að leiga það, húsið kostaði nokkur hundruð krónur og hljómsveit alveg 5000 krónur. Svo úr var að haldinn var skemmtun í samkomuhúsinu í Valþjófsdal, haft var bögglauppboð og Ási í Ástúni og Brynjólfur á Vöðlum skiptust á að spila undir dansi, og þurfti bara að greiða þeim 250 krónur fyrir. Ágóðinn af samkomunni var 4.677 krónur.

Á fjórði fundi félagsins í nóvember 1960, ákváðu konurnar að taka að sér þorrablótið og eins veitingar á jólatréssamkomunni.

Haustið 1961 fóru 12 kvenfélagskonur í berjaferð og er það tekið fram í fundargerðabók að þær hefðu verið fluttar á þremur jeppum að Klukkulandi í Dýrafirði. Engin kona með ökuréttindi auðvitað.

14 október 1962, á bindisdeginum var haldinn félagsfundur og barst fundinum bréf frá Áfengisvarnarnefnd Mosvallahrepps, þar sem félagskonur voru minntar á að það væri vel til fallið að minnst verði á bindindismál á fundinum. Kom þá tillaga frá stjórn kvenfélagsins hvort félagið gæti ekki orðið bindindisfélag. Með því sýndi félagið öðrum kvenfélögum fordæmi. Rebekka tók undir og taldi það ekki vera mikið mál fyrir kvenfélagskonur að gera það „ því enginn okkar vill fara með vín, eða vita neinn af sínum neita þess" eftir að þessi tillaga var borin upp var þögn um stund. .... bætti stjórnin þá við að eins og nú stæði sakir þá gætu höfðingjar þjóðarinnar ekki haldið veislu án víns og svo var væri verið að áfellast unglinganna fyrir áfengisnautn. .... ekki voru konur tilbúnar til að fallast á þessa tillögu en samþykktu að vinna áfram að áfengisvörnum.

 

Fjáröflunarsamkoma var haldinn í Holti um haustið 1962, fór hún frekar illa fram og var lítill ágóði því það var aðeins 200 krónur ágóði á hverja félagskonu og var það fært til bókar að það væri alveg eins gott, að hver félagskona legði fram þessa fjárhæð til, því hljómsveitinn hefði mætt drukkinn til leiks og hélt áfram að drekka inni í samkomuhúsinu meðan á samkomunni stóð.

Árið 1963 lagði stjórnin til að konur nýttu sér hvíldarviku sem í boði var inn í Reykjanesi, engin af fundarkonum taldi sig hafa ástæðu eða áhuga á að nýta sér þetta.

Árið 1966 lagðist ein kvenfélagskona á sjúkrahús og auðvitað samþykktu félagskonur að rétta heimilinu hjálparhönd með þvotta og hirðingu. Upp úr þessu var rætt um þetta á félagsfundi, formaður hafði framsögu, talaði hún um nauðsyn þess að fengin yrði hjálparstúlka til að hlaupa í skarðið þegar veikindi bæri að höndum. Ásta sagði frá að hjálparstúlka væri starfandi í Reykjadal og væri það mjög vinsælt.

Á fundi félagsins í október 1966 kom Rebekka með tillögu um að flutt yrði á næsta fundi SVK að eitthvað yrði gert fyrir vandræðabörn á Vestfjörðum. Þau gætu ekki verið í skólum með örðum börnum enda ekki heppilegt að hafa þau með heilbrigðum og óspilltum börnum. Hér þyrfti að leita til þeirra sem völd hefðu og fé, og væri vel til fallið að SVK gerði það. Elín tók til máls og kvað það verkefni fyrir kvenfélögin að hafa þarna framgöngu. Fleiri létu í ljós fylgi sitt við þetta, og Ágústína sagði að á sambandsfundi mætti líka hreyfa því að komið yrði á áfengislausum  unglingasamkomum..

Sunnudaginn 26. júní fóru fram hreppsnefndarkosningar í Holtskóla, Kvenfélag Mosvallahrepps veitti kaffi öllum kjósendum og öðrum gestum, því allir hreppsbúar voru velkomnir á staðinn. Undir borðum söng Brynjólfur á Vöðlum þrennar gamanvísur. Einar nýkveðnar og tvennar sem ortar höfðu verið fyrir þorrablótið sem ekki var haldið þá um veturinn. Síðan var dansað um stund og spilaði Brynjólfur fyrir dansinum. Þá fengi menn að heyra lög af hinu nýja segulbandi sem kvenfélag Mosvallahrepps hefur gengist fyrir að keypt væri.

 

Dansnámskeið var haldið í febrúar 1967 að forgöngu kvenfélagins, þar námu 26 börn og 18 fullorðnir dansmennt . Í lok námskeiðsins var haldinn skemmtun og sungu Brynjólfur og Björgmundur gamanvísur eftir Guðmund Inga til kennarans Jónínu , Söngurinn var tekinn upp á segulband sveitarinnar, eins og öll lögin sem dansað var eftir á námskeiðinu.

Kvenfélagið stóð líka fyrir á næstu árum að keypt yrði borðbúnaður í Holtskóla og skápur undir það. Gluggatjalda efni í skólann, og öskubakkar, þrátt fyrir bindismarkmið félagsins. Dregill í kirkjuna, styrkt voru samfélagsverkefni hér á Vestfjörðum og jafnvel víðar  og sendu styrki til flóttamenna í Pakistan.

Árið 1965 var varið 25.745 krónum í framlög félagins til ýmissa málefna, heima og að heiman, en þetta jafngildir að verðlagi í dag 376.000,- krónum. Voru það bæði hungraðir út í heimi og nýfæddir fyrirburar á Flateyri sem fengu að njóta.

Kvenfélagskonum var fátt við óviðkomandi, þær fengu Sigurveigu í Holti sem var hjúkrunarkona til að kenna þeim lífung úr dauðadái, kennt var á brúðu sem félagið hafði fengið lánað hjá slysavarnarfélagið á Flateyri. Þær gengu líka í verkin í Ungmennafélaginu þegar þeim fannst dauft yfir félagsstarfinu þar og samþykktu árið 1970 að vinna með ungmennafélaginu um sumarið að íþróttastarfi. Konur fóru oft í skemmtiferð og voru staðir í nágrenninu heimsóttir, Bolungarvík, Súgundafjörður og Ingjaldssandur.  Þegar árin liðu urðu ferðirnar strjálar en lengri.

Félagskonur héldu sína fundi eftir ströngum fundarsköpum og ekki var gengið að neinu nema að nefnd yrði kosin í verkið. Á fundi 1971 minnti Ásta á að semja þyrfti reglugerð um prjónavélina sem var þá nýkeypt fyrir félagskonur og Jóhanna stakk samstundis upp á því að nefnd yrði kosin í málið og var það gert. Í janúar 1972 hafði hins vegar ekkert gerst í reglugerðarnefnd prjónavélarinnar og tók Ásta aftur málið upp á fundi, var mikið rætt um vélina bæði um daggjöld, og tímaskiptingu og kennslu á vélina. EN málinu var enn slegið á frest þangað til reglugerðarnefndin skilaði af sér.

Konur létu þjóðmálin líka til sín taka. Árið 1974 sendi félagið frá sér svohljóðandi ályktun til þjóðhátíðarnefndar fyrir þjóðhátíð vegna 1100 afmælis búsetu í landinu:

Kvenfélag Mosvallahrepps í Önundarfirði skorar á þjóðhátíðarnefnd að hætta við hin fyrirhuguðu hátíðarhöld 1974, en verja því fé sem ætlað var til hátíðarhaldanna til hjálpar Vestmanneyingum, enda væri það bruðl að halda upp á 1100 ára búsetuna á jafn íburðarmikinn hátt sem ætlað var.  ( þær hefðu verið góðar í eftirlitsnefnd fjármálastofnanna fyrir hrun)

Á Aðalfundi 1970, baðst Sigurveig í Holti undan endurkosningu í varastjórn félagsins og undan öllum embættum þar sem hún væri orðin útivinnandi húsmóðir, en hún var þá nýtekin við stöðu hjúkrunarkonu í Flateyrarhreppi.

 

1976 hélt kvenfélagið kaffisölu í Holtskóla í tengslum við Hrútasýningu sem haldin var í Innri Hjarðadal,  ( já öðruvísi mér áður brá) Það komu nálægt 90 manns í kaffi. Tekið er fram í fundargerðarbók að brauð og kökur hafi verið óskammtað og ágóði varð 18.950 krónur en kaffið var selt á 350 kr.

 

Ég gríp hér niður í frásögn af þorrablóti 1978, sem haldið var 20 janúar. 62 sóttu blótið allt frá ársgömlu til sjötugs. Brynjólfur flutti annál ársins . Næst flutti Hjördís á Mosvöllum frásögn úr ferð sinni til aðalstöðva sameinuðu þjóðanna haustið áður og sagði frá mörgu nýstárlegu sem fyrir hana bar í þeirri heimsókn til hinnar tröllauknu borgar New York, þar sem andstæðurnar eru svo miklar annars vegar óhófseyðsla, hinsvegar örbirgð. Því næst flutti Brynjólfur þorrabraginn að vanda og spilaði undir á harmóniku en Björgmundur fletti blöðunum eftir þörfum.  Bragurinn var langur og fjallaði mestu um ráðagerðir vegagerðarinnar um nýjan veg fyrir Önundarfjörð...... á eftir borðhald spiluðu Kristinn Valdimarsson á Núpi og Bergsveinn Gíslason  á mýrum fyrir dansi og var að sjálfsögðu byrjað á marsi sem Magnús í Tröð stjórnaði. Hann stjórnaði líka spurningakeppni en nefndarkonur stjórnuðu smáglettum sem þær létu einhverja samkomugesti skemmta öðrum með, fyrirvaralaust.

 

 

95 ára afmæli Jóhönnu

 

Á vormánuðum 2003 voru haldnir tveir undirbúningsfundir vegna ferðar til

Patreksfjarðar í tilefni 95 ára afmæli Jóhönnu Kristjánsdóttur.  Voru valdir

söngvar úr söngbók kvenfélagsins til að syngja og tekið fram í fundargerð að

æft hafi verið af innlifun í tóntegund Helgu Dóru.

 

Laugardaginn 3. maí var síðan haldið til Patreksfjarðar í afmælið sem gekk

í alla staði vel.  Á heimleið, seinni part dags, var svo gaman í rútunni að

tekið er fram í fundargerð að ekki hafi verið sofið - og það alla leið frá

Patreksfirði.

 

 

Á aðalfundi 2006 var greint frá niðurstöðum könnunar meðal

kvenfélagskvenna sem Halla Signý formaður stóð fyrir.  Kom m.a. fram í

niðurstöðunum að þýðing kvenfélags væri gott samfélag og í hugmyndum að

fundarefnum kom fram að bjóða ætti upp á karókí.  Af því hefur þó ekki enn

orðið en ýmislegt annað tekið fyrir s.s. yoga, ditox, dans og sigling á

víkingaskipi.

 

 

Ýmislegt gerist á kvenfélagsfundum.  16. ágúst 2007 var í lok fundar boðið

upp á að prófa nuddpúða sem meira að segja gekk fyrir rafmagni og vakti víst mikla lukku Allt var þetta samviskusamlega fært til fundargerðar.

 

 

 

 

 

 

Kvenfélagið okkar er komið á virðulegan aldur. En það var stofnað 10. apríl 1960. Það voru sautján vaskar konur sem komu saman og  var tilgangur félagsins er að auka kynningu og efla félagshug með konum sveitarinnar og veita þeim tækifæri til að koma saman og ræða áhugamál sín og hugðarefni.


Konur í kvenfélaginu ætla að minnast þessara tímamóta og bjóða félagskonum og mökum þeirra til kvöldverðar í Friðarsetrinu í Holti laugardagskvöldið 26. júní.
Okkur til mikillar ánægðu ætla margar fyrrverandi félagskonur að koma líka og verður örugglega mikið gaman að koma saman og rifja upp liðna tíma, því nú eins og fyrir fimmtíu árum komum við saman til að ræða okkar áhugamál og hugðarefni.

Í dag eru 17 konur í félaginu, svo við höldum enn okkar, þrátt fyrir að fækkað hafi í sveitinni, en félagskonur koma líka frá Flateyri, Ísafirði og Bolungarvík.

Kvenfélagasamband Íslands fagnar 80 ára afmæli sínu í ár, en það var stofnað 1. febrúar 1930. Ákveðið hefur verið af KÍ, að 1. febrúar verði dagur kvenfélagskonunnar, til að minnast starfa þeirra í þágu samfélagsins. Kvenfélagskonur hafa gegnum tíðina starfað af elju og dugnaði og auðgað menningu og mannlíf með ýmsum samkomum og uppákomum.

Vestfirskar konur

Samband verstfiskra kvenna er einnig 80 ára í ár, en innan sambandsins starfa 14 kvenfélög, frá Barðaströnd inn í Djúp. Fyrsta kvenfélagið á Vestfjörðum var reyndar stofnað árið árinu 1906 í Haukadal í Dýrafirði, saga þeirra spannar því á aðra öld. Sum hafa liðið undir lok, en enn fleiri hafa verið stofnuð. Kvenfélögin eru sjálfstæðar einingar og taka sér fyrir hendur ólík verkerfni, en velja sér starfsvettvang þar sem þær telja farsælast á hverjum stað. Ófáir hafa notið stuðnings þeirra með beinum fjárframlögum Þrátt fyrir að hafa mörg hver starfað í marga áratugi, hafa félögin aðlagað sig að nýjum tímum, með breyttum áherslum. Það gera þau með því að að hlúa að sínum félagskonum, en jafnframt taka þátt margvíslegum þáttum samfélagsins. Hver kannast ekki við að hafa tekið þátt í þorrablóti, jólaskemmtun, álfadansi, spilakvöldi, kaffiboðum, ferðalagi, námskeiði eða hvaðeina, sem kvenfélagskonur standa fyrir. Það má með sanni segja, að félögin séu horsteinn menningar í hverju byggðalagi.

Húfuverkefni

Hver nýburi sem fæðist á þessu ári, fær að gjöf húfu frá kvenfélagskonu. Þetta er verkefni er unnið á landsvísu í samvinnu við ljósmæður. Um 5.000 börn fæðast árlega, þannig að nú er prjónað af kappi til að fylla kvótann. Við tökum þannig þátt í gleði foreldra með nýfæddu barni. Kvenfélagskonur hafa líka verið ötular að gefa fjármagn til að bæta aðstöðu á fæðingardeildum.

Framtíðin

Ég er bjarsýn á framtíð kvenfélaga og tel að þau eigi bara eftir að eflast. Það hefur sýnt sig að nýjar konur eru tilbúnar að ganga inn í félögin. Þau eru einfaldlega að komast aftur í tísku, ef hægt er að tala um það. Það hefur verið góð leið fyrir konur að kynnast og taka þátt í samfélagsstörfum, að ganga í kvenfélagið á staðnum. Mér hefur td. þótt sérlega vænt um það að sjá konur af erlendum uppruna, koma inn og verða sumar öflugar í starfi. Með nýju fólki koma breyttar áherslur og við sem fyrir erum, byggjum saman gott starf á traustum grunni.

Kvenfélagskonur, til hamingju með daginn!

Helga Dóra Kristjánsdóttir, formaður Sambands verstfiskra kvenna.

Helgina 16.-18. janúar fengum við Mörthu Ernst til að vera með Yoga -hreinsunar námskeið í Holti Friðarssetri.
Þar var unnið með öndun, slökun og yogastöðum sem stuðla að hreinsun líkamans og hugans. 
Farið var í léttar hugleiðslur til að hreinsa og kyrra hugann.  Boðið var upp á létt fæði, hreinsunardrykki og hreinsandi te.  Útiveru og létta hreyfingu.
Gistum í Paradís, Betlehem og Eden en það heita herbergin m.a. sem boðið er að sofa í á Friðarsetrinu.
Kvöldið var notað í dekur og prjónaskap.  Frábær helgi.
Ef þið viljið kynna ykkur ljósyoga Mörthu þá getið þið farið inn á heimasíðu hennar http://ljosyoga.is/
Þið getið líka skoðað myndsíðu okkar hér

Jólaballið 2009 var haldið í Holti, sunnudaginn 27. desember. það var vel mætt eða rúmlega 50 manns.

Það var hvorki meira né minna en heil hljómsveit sem að sá til þess að við gætum dansað í kringum jólatréð.  Það voru feðganir Árni sem spilaði á harmonikku og Benni sem spilaði á trommur svo var það Fjölnir sem spilaði á Bassa.

 

Svo þegar búið var að dansa og dansa komu jólasveinar, börnunum til mikillar ánægju, en þeir áttu erfitt með að finna inngangin og ætluðu þeir að koma inn um gluggana. þegar þeir komust loksins inn var dansað aðeins meira í kringum jólatréð og svo fengu allir epli frá jólasveininum.

 

 

Að lokum var svo fengið sér kaffi, öl og kökur og var af nógu að taka.

 

 

vill kvenfélagið þakka öllum sem komu fyrir góða skemmtun

Þrjár Kvenfélagskonur sátu aðaldund vestfiskkra kvenna í Heydal 5. sept.
Helga Dóra sem formaður SVK, Jónína formaður KÖ og Bessa óbreytt kvenfélagskon. Þetta var að öllu leiti frábær ferð sem hófst með súpu í sumarbústaðnum hennar Ínu á föstudagskvöldi. Laugardagurinn fór svo í aðalfundastörf f.h. og námskeið sem kallaðist "Konur kalla" eftir hádegi. Um kvöldið var svo kvöldverður og kvöldvaka og haldið heim á sunnudeginu. Þetta voru alveg frábærir dagar með frábærum konum. Mjög skemmtilegt að vera í Heydal en gestgjafarnir þar leggja sál sína í móttökur og matseld. Takk fyrir frábæra daga kvenfélagskonur. Læt hér fylgja nokkrar myndir.

http://kvenfelagmosvallahrepps.bloggar.is/album/56142/

Sólvieg Bessa Magnúsdóttir.... Nánar